Delegados/as da CIG automoción mobilízanse diante de Antolín Vigo denunciando a precariedade no sector

Durante a protesta, que foi parte da campaña de conmemoración do 10 de Marzo, tamén rexeitaron a represión sindical nas compañías. A CIG na porta de Antolín Arredor dun...

Durante a protesta, que foi parte da campaña de conmemoración do 10 de Marzo, tamén rexeitaron a represión sindical nas compañías.

A CIG na porta de Antolín

Arredor dun cento de delegados/as da CIG na automoción viguesa desenvolveu o xoves unha concentración ás portas da empresa Antolín, situada no polígono industrial de Valadares, para denunciar a crecente precarización e os recortes salariais e nas condicións laborais que están a aplicar as compañías do sector. 

Durante a protesta, que fai parte da campaña comarcal de conmemoración do 10 de Marzo, tamén se rexeitou a represión sindical e a chantaxe por parte das direccións das empresas.
“Non á precarización na automoción”, “Somos traballadores/as e non mercadorías”, “Dereitos conquistados non poden ser roubados” ou “Non á represión na automoción” foron as consignas que máis se repetiron durante a mobilización convocada pola CIG-Industria de Vigo ás portas da empresa Antolín no polígono industrial de Valadares. Arredor dun cento de delegados/as da central despregou unha faixa diante da compañía na que se podía ler “Contra as ameazas da patronal. Emprego e salarios dignos no sector da automoción”. A protesta prolongouse case unha hora entre as 11.00 e as 11.45 horas.

Protestas dos delegados da CIG Industria

Dende a CIG-Industria de Vigo explicaron que coa protesta, que fai parte da campaña de mobilizacións convocadas a nivel comarcal para conmemorar o Día da Clase Obreira Galega, pretenden denunciar a crecente problemática que padecen os traballadores/as do sector. “Temos que parar as medidas que pretenden levar adiante as empresas nos novos convenios, no sentido de introducir rebaixas salariais, aumentos de xornada, novas categorías de entrada e ritmos de produción máis altos”, indica Xulio Fernández, secretario comarcal da federación.

O responsábel sindical denunciou tamén a represión sindical e a chantaxe que están a facer as direccións das compañías coa escusa de lograr máis carga de traballo e amosou a súa preocupación porque o ERE que vén de presentar PSA Citroën teña repercusións negativas o resto de empresas da automoción.

RELACIONADAS